நாமக்கல் ரயில் நிலையத்தை பொதுமக்கள் அதிக அளவில் பயன்படுத்த கோரிக்கை

புதிய ரயில் சேவைகளை பெறுவதற்கு, நாமக்கல் ரயில் நிலையத்தை அதிக அளவில் பொதுமக்கள் பயன்படுத்த வேண்டும் என ரயில் பயணிகள் சங்கத்தினர் வேண்டுகோள் விடுத்துள்ளனர்.

இது குறித்து நாமக்கல் மாவட்ட ரயில் பயணிகள் சங்க செயலாளர் கார்த்திக் வெளியிட்டுள்ள அறிக்கையில் கூறியுள்ளதாவது:

நாமக்கல், கரூர் மாவட்ட மக்களின் நீண்ட நாள் கனவை நிறைவேற்றும் வகையில், 2013 முதல், சேலம் – நாமக்கல் – கரூர் ரயில் சேவை தொடங்கப்பட்டது. நாமக்கல் ரயில் நிலையம் மூலம், நாமக்கல் மாநகர், சேந்தமங்கலம், ப.வேலூர், திருச்செங்கோடு, கொல்லிமலை, மோகனூர், ராசிபுரம், திருச்சி மாவட்டம், தொட்டியம், துறையூர், மேட்டுப்பாளையம், முசிறி, காட்டுப்புத்தூர் சுற்று வட்டார பகுதியை சேர்ந்த, சுமார் 15 லட்சத்திற்கும் மேற்பட்ட பயணிகளுக்கு பயன்பெறும் வகையில் அமைந்துள்ளது.

அம்ரித் பாரத் திட்டத்தின் கீழ், ரூ. 10 கோடி மதிப்பில், நவீன வசதிகளுடன் நாமக்கல் ரயில் நிலையம் மேம்படுத்தப்பட்டுள்ளது. இந்த ரயில்நிலையத்தின் வழியாக, தற்போது, சென்னை, பெங்களூரூ, மதுரை, திருநெல்வேலி, ராமேஸ்வரம், புனே, மும்பை, திருப்பதி, ஹைதராபாத், சூரத், அகமதாபாத், ஓகா, ஜோத்பூர், விஜயவாடா, நாக்பூர், போபால், கான்பூர் போன்ற பல முக்கிய நகரங்களுக்கு, நேரடி ரயில்கள் இயக்கப்பட்டு வருகின்றன. 2025-26ம் நிதியாண்டில், நாமக்கல் ரயில் நிலையத்தின் மூலம் பயணிகள் வருவாய் ரூ. 3.95 கோடியாகவும், மொத்தம் பயணிகள் பயன்பாடு, ஒரு லட்சத்து, 38 ஆயிரத்து 855 ஆகவும் இருந்தது.

நாமக்கல் ரயில் நிலையத்தின் மக்கள் பயன்பாடு மற்றும் வருவாய் மேலும் அதிகரித்தால் மட்டுமே, புதிய ரயில் சேவைகளை நாம் பெற முடியும். அதனால், இளைஞர்களும், பொதுமக்களும் முன்கூட்டியே பயணங்களை திட்டமிட்டு, நமது நாமக்கல் ரயில்நிலையத்தை முறையாக பயன்படுத்தி, ரயில் மூலம் அதிக அளவில் பயணிக்க வேண்டும்.

நாமக்கல் ரயில் நிலையத்திற்கு நகரில் இருந்து போதிய பேருந்து வசதி இல்லை. நாமக்கல் மாவட்ட நிர்வாகம் அதற்கு உரிய நடவடிக்கை எடுத்தால், ரயில் நிலையத்திற்கு அதிக அளவில் பயணிகள் வந்து ரயிலை பயன்படுத்துவதற்கு வாய்ப்பாக அமையும். அதன் மூலம், கூடுதல் ரயில் சேவையும் பெறுவதற்கு வசதியாக இருக்கும் என அதில் தெரிவிக்கப்பட்டுள்ளது.