1970ம் ஆண்டில் தமிழகத்தில் மின்கட்டணத்தை எதிர்த்து நடைபெற்ற போராட்டத்தில் உயிரிழந்த விவசாயிகளின் குடும்பங்களுக்கு கருணை அடிப்படையில், தமிழக அரசு வேலை வழங்க வேண்டும் என கொமதேக வேண்டுகோள் விடுத்துள்ளது.
இது குறித்து கொங்குநாடு மக்கள் தேசிய கட்சி பொது செயலாளர் ஈஸ்வரன் வெளியிட்டுள்ள அறிக்கையில் கூறியுள்ளதாகவது:
1970ம் ஆண்டு தமிழகத்தில் உயர்த்தப்பட்ட விவசாயத்திற்கான மின் கட்டணத்தை குறைக்க வேண்டும் என்று தமிழ்நாடு முழுவதும் விவசாயிகள் போராட்டத்தில் ஈடுபட்டனர். அப்போதைய அரசு போராட்டத்தை கட்டுப்படுத்துவதற்காக துப்பாக்கி சூடு நடத்த உத்தரவிட்டு, 63 பேர் துப்பாக்கியால் சுடப்பட்டு உயிரிழந்தினர்.
அதற்குப் பிறகு நடந்த பல்வேறு அரசியல் மாற்றங்களுக்குப் பிறகு, தமிழகத்தில் விவசாயிகளுக்கு கட்டணமில்லா மின்சாரம் வழங்கப்பட்டது. கடந்த காலங்களில் எங்களுடைய கோரிக்கையை ஏற்று உயிரிழந்த விவசாயிகள் குடும்பத்தினருக்கு தலா ரூ. 5 லட்சம் நிதி உதவி வழங்கப்பட்டது.
கடந்த பல வருடங்களாக தொடர்ந்து விவசாயிகளுக்கு இலவச மின்சாரம் வழங்க காரணமாக இருந்த, உயிர் நீத்த தியாகிகளின் குடும்பத்தில் தலா ஒருவருக்கு அரசு வேலை கொடுக்க வேண்டும் என்று அரசை வலியுறுத்தி வருகின்றோம். பல்வேறு அரசுகளிடம் கருணை அடிப்படையில் அரசு வேலை வழங்க கோரிக்கை வைத்தும் அது நிறைவேறவில்லை.
தற்போதைய தமிழக அரசு சார்பில், கரூரில் அரசியல் நிகழ்ச்சியில் உயிரிழந்த குடும்பங்களுக்கு கருணை அடிப்படையில் அரசு வேலை வழங்கப்பட்டுள்ளது. அரசியல் நிகழ்ச்சியில் கூட்ட நெரிசலில் உயிரிழந்தவர்களுக்கு கருணை அடிப்படையில் அரசு வேலை வழங்கும் நிலையில், தமிழ்நாட்டில் இருக்கின்ற அனைத்து விவசாயிகளின் குடும்பங்கள் வாழ்வதற்காக உயிர்த்தியாகம் செய்த, தியாகிகளின் குடும்பங்களுக்கு கருணை அடிப்படையில் அரசு வேலை வழகுவதில் தவறேதும் இல்லை.
ஒவ்வொரு முறை மேடையில் பேசும்போதும் விவசாயிகளோடு உடனிருப்பேன் என்று பேசுகின்ற இன்றைய முதலமைச்சர், கனிவோடு பரிசீலித்து விவசாய மின் கட்டண உயர்வுக்காக போராடி உயிர் நீத்த விவசாயிகளின் குடும்பங்களுக்கு கருணையோடு தகுதி அடிப்படையில் அரசு வேலை வழங்க முன்வர வேண்டும் என கூறப்பட்டுள்ளது.
